Le Catta del Montania Dovrefell

 per sir George W. Dasent

 pictura per J.M. Corner

 Olim il es un homine in Finnmark qui habeva capturate un grande, blanc urso, le qual ille vadeva conducer al rege de Danmark. Il occurreva, que ille veniva al montania Dovrefell al vespere ante Natal, e illac ille stoppava a un alberga, ubi un homine habitava, cuje nomine esseva Halvor. Ille peteva al homine, si ille poteva locar un camera pro se e le urso.

 Le homine diceva, ”Que le celo me nunquam adjuta, si lo que io dice non sia ver! Nos non pote dar a alcuno qualcunque camera iste die, proque cata nocte ante Natal tante gruppo del Trollos veni contra nos, que nos debe fugir, e nos non ha un tecto super nostre capites, dunque nos non pote dar.”

 Le homine diceva, ”Oh, si isto es toto, vos pote locar a me vostre domo. Mi urso pote dormir sub le estufa, e io pote dormir in le camera lateral.”

 Alora, ille si multo peteva, que al fin ille recipeva le permission a dormir. Post isto le gente del domo fugiva, e ante que illes partiva, illes preparava toto pro le Trolles: illes poneva super le tabula pappa del ris, pisces cocite in lixivia, salsicias, e toto bon que illes habeva.

 Tunc, quando toto esseva preparate, le Trolles veniva. Alcunos esseva grande e alcunos parve; alcunos habeva longe caudas e alcunos habeva nulle cauda; e alcunos habeva nasos longe. Illes mangiava e bibeva e gustava toto. Justo tunc un del Trolles parve remarcava le urso blanc, le qual dormiva sub le estufa. Assi ille prendeva un pecia de salsicia, lo poneva super un furca, e lo pulsava in le naso del urso, critante:

 ”Catteta vole salsicia?”

 Tunc le urso blanc se levava e grunniva e chassava le tote gruppo de illes ex le domo, e grande e parve.

 Le anno sequente, Halvor esseva in le foreste durante le die ante Natal, secante ligno del calefaction ante le festa, proque ille pensava, que le Trolles se vadeva retornar. Durante ille multo laborava, ille audiva un voce critante in le foreste:

 ”Halvor! Halvor!”

 Halvor diceva, ”Alora, ecce io.”

 ”Esque tu nunc ha le grande catta con tu?”

 Halvor diceva, ”Si, io la ha. Illa jace in le domo sub le estufa. In plus, illa nunc ha septe cattones, multo plus grande e feroce que illa mesme.”

 Le Troll critava ex le foreste, ”Oh, alora, nos nunquam venira e visitara vos.” E ille manteneva su promissa, proque post isto le Trolles ha nunquam mangiate lor festa de Natal con Halvor a Dovrefell.