Le mysterio del indianos mandan

Indianos american o vikings o galleses?

Il ha contos que le indianos american con le nomine mandan, qui habitava le costas del Riviera Missouri in presente Dakota del Nord, includeva gente blanc. Esque isto es possibile?

Un theoria es que le mandan acceptava vikings. Il ora es cognoscite que vikings veniva a America del Nord circa le anno 1000. Le mandan habeva le fama de esser multo amical. Esque vikings habitava con illes?

Un altere theoria es super le gallese Prince Madoc. A causa de combatto inter altere chefs gallese, in 1170 ille con su gente partiva in naves pro trovar un terra plus pacific. Il habeva in le initio del habitantes europee in America del Nord poc contos super indianos qui parlava le lingua gallese. Esque il poterea esser, que illes habitava con le mandan?

Un altere affaire curiose es que le mandan ha un historia de un homine qui superviveva un grande inundation, multo similar al historia super Noe in le Biblia.

Un del prime blancos qui visitava le mandan esseva un francese-canadiano, Pierre Gaultier, Sieur de La Verendrye, durante que ille cercava le "Mar del West". Ille scribeva isto in 1738: "Le nation es miscite blanc e nigre. Le feminas es assatis belle, particularmente le blancas, multes con capillos blonde."

Carta ancian con le Mar del West - Wikimedia

Le capitanos american William e Clark visitava le mandan in 1804 e 1806. Illes diceva nihil super gente blanc. Totevia un de lor soldatos, Joseph Whitehouse, scribeva: "Illes ha un multo blanc color." (Le honor del capitanos es famose - de Whitehouse dubitose.) 

Le pictor famose George Catlin visitava le Mandan in 1832 pro registrar con picturas lor maniera de viver. Ille scribeva: "Il ha multo multes de iste gente cuje facies es pallide. Inter le feminas es specialmente multes, cuje pelles es quasi blanc; con oculos brun, gris e blau." (Nota le parola "quasi".) Ille pensava que lor barcas esseva similar a illos del galleses. 

Un picture del puera del Mandan per Catlin - Wikimedia 

Quasi tote le mandan, amical al blancos, moriva a causa de maladias del blancos, specialmente variola. Eventualmente le blancos fortiava le superviventes a terra reservate pro indianos. Illes se intermaritava con altere gentes indian. Le persona, qui credeva que illa esseva le ultime pur del mandan, Mattie Grinnell, moriva in 1975.

Circa vinti annos retro io attendeva un lection super iste affaire a Fort Abraham Lincoln State Park [Parco del Dakota del Nord del Castello Militar Abraham Lincoln], que ha un reconstruction de un village del mandan. Le indianos mesme prefereva le idea del vikings. Totevia le parlator chef blanc non credeva le theoria; ille diceva: "Nos blancos ama le mandan. Dunque nos essaya facer les esser como nos."

Le reconstruction de un village del mandan - Wikimedia 

Mi proprie theoria es que qualque blancos usava le idea de indianos blanc pro vender le libros que illes scribeva super lor viages al west american. Nos totevia non sapera jammais. 

Fontes:

Journal of the First Expedition of Pierre Gaultier, Sieur de LA Verendrye to the Mandan Villages on the Missouri. (Traduction del francese) 

James D. McLaird: The Welsh, the Vikings, and the Lost Tribes of Israel on the Northern Plains: The Legend of the White Mandan. 1998, South Dakota States Historical Society.

Fort Abraham Lincoln State Park, North Dakota.